Monday, 30 June 2014

ವಿಜಯ ಕರ್ನಾಟಕ ತುಳುಚಾವಡಿ ಸರಣಿ -2 ಕಾರಣಿಕದ ದೈವೊ- ಅಜ್ಜಿ ಬೂತೊ-ಡಾ.ಲಕ್ಷ್ಮೀ ಜಿ ಪ್ರಸಾದ (8 ಏಪ್ರಿಲ್ 2014)


                                          


 http://vijaykarnataka.indiatimes.com/articleshow/33403253.cms


ತುಳು ಚಾವಡಿ-ಕಾರಣಿಕದ ದೈವೊ- ಅಜ್ಜಿ ಬೂತೊ
ಸುಳ್ಯ ತಾಲೂಕುದ ಮಡಪ್ಪಾಡಿ, ಕಂದ್ರಪ್ಪಾಡಿ, ವಾಲ್ತಾಜೆ ಇಂಚಿತ್ತಿನ ಪ್ರದೇಸೊಡು ಬಾರೀ ಕಾರನಿಕೊಡು ಮೆರೆಪಿನ ದೈವೋ ಸುಬ್ಬಜ್ಜಿ ಭೂತ. ಸುಬ್ಬಜ್ಜಿ, ಸಬ್ಬಜ್ಜಿ, ಸಬ್ಬಕ್ಕ ಇಂಚಿತ್ತಿನ ಬೇತೆ ಬೇತೆ ಪುದರ್‌ಡ್ ಅಜ್ಜಿ ಭೂತೊದ ಆರಾಧನೆ ಮಲ್ಪುವೆರ್.

ಅಜ್ಜಿ ಬೂತೊದ ಕೋಲ ಆಕರ್ಷಕ. ಯಕ್ಷಗಾನದ ಸ್ತ್ರೀ ವೇಷೊಗುಲಾ ಉಂದೆಕ್ಕ್ ಲಾ ಸಾಮ್ಯತೆ ಉಂಡು. ಅಜ್ಜಿ ಬೂತೊದ ಕೋಲೊಡು ಕೋಪ ರೌದ್ರತೆ ಆರ್ಭಟ ಇಜ್ಜಿ. ಮೋಕೆ, ಪ್ರಶಾಂತ ಅಭಿನಯ ಲಕ್ಕ್‌ದ್ ತೋಜುಂಡು. ಈ ದೈವೊದ ಪಾಡ್ದನ ತುಳುಟ್ಟು ಉಂಡು. ಆಂಡ ನುಡಿಗಟ್ಟ್ ಕನ್ನಡ. ಬಹುಷ: ಅಜ್ಜಿ ಬೂತೊದ ಮೂಲ ಪೊಣ್ಣು ಕನ್ನಡತಿ ಆದುಪ್ಪೊಡು.

ಅಜ್ಜಿ ಬೂತೊಲಾ ಉಲ್ಲಾಕುಳು ದೈವೊಲಾ ಒಟ್ಟುಗು ಗಟ್ಟ ಜತ್ತ್‌ದ್ ಬನ್ನಗ ಕೂಜಿಲೆನ್ ಲೆತೊಂದು ದೆಂಜಿ ಪತ್ತ್ಯೆರೆ ಬರ್ಪಲ್ ಪನ್ಪಿನ ನಂಬಿಕೆ ಉಂಡು. ಬಳ್ಪದ ತ್ರಿಶೂಲಿನಿ ದೇವಸ್ಥಾನೊಗು ಸಮ್ಮಂದಪಟ್ಟ್‌ನ ಐತಿಹ್ಯೊಡು ಅಜ್ಜಿ ಬೂತೊದ ಬಗ್ಗೆ ಪನೀತ್ ಮಾಹಿತಿ ಉಂಡು. ಉಲ್ಲಾಕುಳು ದೈವೊ ಬನ್ನಗ ಬಳ್ಪ ದೇವಸ್ಥಾನೊಡು ಒಂಜಿ ಪೊಣ್ಣ ರೂಪೊದ ಬೊಣ್ಚಿ ತೋಜುಂಡು. ಆ ಶಕ್ತಿದ ಒಟ್ಟುಗು ಉಲ್ಲಾಕುಳು ಕುದುರೆಡ್ ಕುಲ್ಲುದು ಪೋನಗ ಜನ ತೆಲಿಪುವೆರ್. ಅಪಗ ನಾಚಿಕೆ ಆದ್ ಒಂಜಿ ಗುಹೆಕ್ ನೂರಿಯೆರ್. ಆ ಪೊಣ್ಣ ಶಕ್ತಿಯೇ ಬೊಕ್ಕ ಅಜ್ಜಿ ಬೂತೊ ಪಂಡ್‌ದ್ ಪುದರಾಪುಂಡು.

ಸುಳ್ಯದ ಕಾಯರ್ತೋಡಿ ಜಾಲಾಟೊಡು ಸಬ್ಬಕ್ಕ ಎಡ್ತೆರ್/ಸಬ್ಬಡ್ತೆರ್ ಪನ್ಪಿನ ಒಂಜಿ ದೈವೊಗು ಆರಾಧನೆ ಉಂಡು. ಮೂಲತಃ ಅಂಗಯಿ ಗೌಡೆರೆ ಮಗಲ್ ಸಬ್ಬಕ್ಕ ದೇಂಗೋಡಿ ತರವಾಡ್ ಇ್ಲ್ಗ್ ಮದಿಮೆ ಆದ್ ಬರ್ಪಲ್. ಒಂಜಿ ದಿನ ಇಲ್ಲದ ಪೊಂಜೊವೆಲೆನ ಒಟ್ಟುಗು ತಪ್ಪು ಕನಯೆರೆ ಪೂಮಲೆ ಕಾಡ್‌ಗ್ ಪೋಪಲ್. ತಪ್ಪು ಪಿರೆದ್ ತರೆಟ್ ತುಂಬೊಂದು ಬನ್ನಗ ಸಬ್ಬಕ್ಕ ಅಕೇರಿಗ್ ಒರ್ತಿಯೆ ಒರಿಪಲ್. ಅಪಗ ಏರೋ ಬತ್ತ್‌ದ್ ಆಲೆನ ತರೆಕ್ ತಪ್ಪುದ ಕಟ್ಟ ತುಂಬಾವೆರ್. ಗುಡ್ಡೆದ ಮಿತ್ತ್ ಬಲಾಂದ್ ಲೆಪ್ಪುವೆರ್. ಆ ಪೊರ್ತುಡು ಸಬ್ಬಕ್ಕ ಮಾಯ ಆದ್ ಉಳ್ಳಾಕುಲೆನ ಬಲತ್ತ ಭಾಗೊಡು ಉಂತುವಲ್ ಪನ್ಪಿನ ಕತೆ ಉಂಡು.

ಅಜ್ಜಿ ಬೂತೊದ ಒಟ್ಟುಗು ರಡ್ಡ್ ಕೂಜಿಲ್ ದೈವೊಲೆಗ್ ಆರಾಧನೆ ನಡಪುಂಡು. ಕೂಜಿಲೆನ ಕೋಲ ಆನಗ ಅಲ್ಪ ಕೋಟೆ ಕಟ್ಟುವೆರ್. ಕೋಟೆ ಕಡಿದ್ ಪೋಂಡ ಅಕುಲು ಪಿರ ಬರ್ಪುಜೆರ್ ಪನ್ಪಿನ ನಂಬಿಕೆ ಉಂಡು. ಅಕುಲು ತೋಟೊಗು ಪೋದು ಬಜ್ಜೈ, ಬೊಂಡ ಕನಪಿನ ಕ್ರಮ ಉಂಡು. ಅಕುಲೆನ್ ಗಂಡ ಗಣಕುಲುಂದ್ ಲೆಪ್ಪುವೆರ್. ಉಂದೆನ್ ಮಾತಾ ತೂನಗ ಮೂಲತಃ ಕೂಜಿಲ್ ಲೂಟಿ ಮಲ್ಪೆರೆ ಬತ್ತಿನ ಅರಸು ಸೈನಿಕೆರ್ ಪಂಡ್‌ದ್ ತೆರಿದ್ ಬರ್ಪುಂಡ್. ಸಾರತ್ತೊಂಜಿ ಬೂತೊಲೆಡ್ ಒಂಜಿ ಆದುಪ್ಪುನ 'ಡೆಂಜಿ ಪುಕ್ಕೆ' ಪನ್ಪಿನ ದೈವೊಲ ಕೂಜಿಲ್ ದೈವೊಲೇ ಆದುಪ್ಪು. ದಾಯೆಗ್ ಪಂಡ ಗಂಡ ಗಣಕುಲೆಗ್ ಡೆಂಜಿ ಬೊಕ್ಕ ಕುಡುತ್ತ ಕೊದ್ದೆಲ್ ಮಲ್ತ್‌ದ್ ಬಳಸುನ ಸಂಪ್ರದಾಯ ಕೆಲವು ಕಡೆಟ್ ಉಂಡು. ಅಜ್ಜಿ ಬೂತ ಕೂಜಿಲೆನ ಒಟ್ಟುಗು ಡೆಂಜಿ ಪತ್ತ್ಯೆರೆ ಬರ್ಪುನ ಬಗ್ಗೆ ಪಾಡ್ದನೊಡು ಮಾಹಿತಿ ಉಂಡು. ಅದ್ಯಯನೊದ ಬೊಲ್ಪುಡು

ಅಜ್ಜಿ ದೈವೊದ ಬಗ್ಗೆ ಅಧ್ಯಯನ ನಡಪೊಡು. ಪೂಮಲೆ ಕಾಡ್‌ಡ್ ಸಬ್ಬಕ್ಕನ್ ಮಿತ್ತ್ ಬಲ ಪಂಡ್‌ದ್ ಪಂಡಿನೆ ಏರ್? ಪೊಸ ಮದಿಮಾಲ್ ಸಬ್ಬಕ್ಕನ್ ಇಲ್ಲದಕುಲು ಕಾಡ್‌ಡ್ ಬುಡ್ಡು ಬತ್ತಿನೆ ದಾಯೆಗ್? ಏರೋ ಕಾಡ್‌ಡ್ ಸಬ್ಬಕ್ಕಗ್ ಉಪದ್ರ ಕೊರಿಯೆರಾ? ಅಪಗ ದುರಂತ ಆದ್ ಸಬ್ಬಕ್ಕನೇ ಸುಬ್ಬಜ್ಜಿ ಅಜ್ಜಿ ಬೂತ ಆದ್ ದೈವತ್ವ ಪಡೆಯೆರಾ? ಅತ್ತ್‌ಂಡ ಆ ಊರುದ ಅರಸು ಅತ್ತ್‌ಂಡ ಏರೋ ಬಲಾಡ್ಯೆರ್ ಸಬ್ಬಕ್ಕನ್ ಒಯ್ತಂದು ಪೋಯೆರಾ? ಏರೋ ಮಲ್ತಿನೆನ್, ಉಲ್ಲಾಕುಲು ದೈವೊದ ಮಿತ್ತ್ ಪಾಡ್ದ್ ದೈವೊನೇ ಮಾಯ ಮಲ್ತ್‌ನೆ ಪಂಡೆರಾ? ಈ ಸಮಗ್ರ ವಿಚಾರೊಲೆನ್ ಅಧ್ಯಯನ ಮಲ್ಪೊಡಾಯಿನ ಅಗತ್ಯ ಉಂಡು. -ಡಾ. ಲಕ್ಚ್ಮೀ ಜಿ. ಪ್ರಸಾದ, ಉಪನ್ಯಾಸೆಕೆರ್, ಬೆಳ್ಳಾರೆ



ಅನಿಸಿಕೆಗಳು:
Aras A, kasaragod ಪ್ರತಿಕ್ರಿಯಿಸಿದ್ದಾರೆ :
15/04/2014 at 10:26 AM
very much intresting ,Thanks to Vijayakarnataka tulu chavadi and Dr.Laxmi G prasad
Guru charana, Bangalore ಪ್ರತಿಕ್ರಿಯಿಸಿದ್ದಾರೆ :
14/04/2014 at 09:34 PM
ಭಾರಿ ಎದ್ದೆ ಬರವೂ ಮಸ್ತ್ ಆಸಕ್ತಿಕರ ದಿನಾಲಇಂಚಿತ್ಟುನ ಒಂಜೊಂಜಿ ಬುಟೋಳೇನ ಬಗ್ಗೆ ತೆರಿಪಾಲೆ ,ಲಕ್ಷ್ಮಿ ಜಿ ಪ್ರಸದೆರೆನಾ ಬ್ಲೋಗ್ ಡ್ ಇಂಚಿತ್ಟುನ ಮಸ್ತ್ ಭುತೊಲೆನ ಬಗ್ಗೆ ಮಾಹಿತಿ ಉಂಡು ,ಅಯಿನು ತುಳು ಚಾವಡಿದ್ ಪಾಡುದು ಮಾತ ತುಳು ಅಭಿಮಾನಿಲೆಗ್ ತೆರಿಪಾಲೆ ಪನ್ದುದು ಎಂಕ್ಲೇನಾವಿನಂತಿ
Vijay Suvarna, Qatar ಪ್ರತಿಕ್ರಿಯಿಸಿದ್ದಾರೆ :
12/04/2014 at 10:54 PM
ತುಳು ಚಾವಡಿಡ್ ಕಾರಣಿಕ ದೈವೊ ಅಜ್ಜಿ ಬೂತೊ... ಪನ್ಪಿನ ಪಿರಾಕ್ ದ ವಿಷಯೊದ ಬಗ್ಗೆ ಡಾ.ಲಕ್ಷ್ಮೀ ಜಿ ಪ್ರಸಾದ್ ಮೆರೆನಾ ಗMಭೀರವಾಯಿನ ಚಿಂತನೆ ನಿಜವಾದ್ಲಾ ಮೆಚ್ಚೋಡಾಯಿನ. ಅಜ್ಜಿ ದೈವೊದ ವಿಷಯೊಡು "ಖಂಡಿತಾ ಆದುಪ್ಪೆರೆ ಸಾಧ್ಯತೆ ಉಂಡು" ಪಂಡ್ ದ್ ಅತಿವಿಶೇಷವಾದ್ ಮೂಡುದು ಬರ್ಪಿನ ಕೆಲವು ಕುತೂಹಲಕಾರಿ ಪ್ರಶ್ನೆಲು ನಿಜವಾದ್ಲಾ ಸುದೀರ್ಘ ಅಧ್ಯಾಯಣೋಗು ಒಟ್ಟು ಕೊರ್ಪುಂಡು. ಇತಿಹಾಸೋದ ಬಗ್ಗೆ ಗಂಭೀರತೆಡ್ ಅಧ್ಯಯನ ಮಲ್ತ್ ದ್ ಕೆಲವು ಸಂಗ್ರಹಯೋಗ್ಯ ಪುಸ್ತಕೊಲೆನ್ ಸಾಹಿತ್ಯಾಭಿಮಾನೆಲೆಗ್ಕೊರ್ತಿನ ಡಾ. ಲಕ್ಷ್ಮೀ ಜಿ ಪ್ರಸಾದ್ ಕಾರಣಿಕೊದ ಅಜ್ಜಿ ಬೂತೋದ ವಿಷಯೊಡ್ ಲಾ ಅಧ್ಯಯನ ಮಲ್ತ್ ದ್ ಪುಸ್ತಕ ರೂಪೊಡು ಓದುಗೆರೆಗ್ ಕೊರೊಡು ಪನ್ಪಿನ ಆತ್ಮೀಯ ಕೋರಿಕೆ. ಅರೀನ ಅಧ್ಯಯನ ಪ್ರಯೊತ್ನೊಡು ಸಫಲತೆ ಕೊರ್ಪಿಲಕ್ಕ ತುಳುನಾಡ್ ದ ಮಾತಾ ದೈವದೇವತೆಲು ಕಾರ್ನಿಕೊಡು ಬೇರಿಸಾಯ ಕೊರಾಡ್ ಪನ್ಪಿನ ತುಳು-ಕನ್ನಡ ಸಾಹಿತ್ಯಾಭಿಮಾನಿ ಯಾದುಪ್ಪುನ ತುಳು ಅಪ್ಪೆನ ಒರಿ ಮಗೆನ ಉಡಲ್ ದಿಂಜಿನ ಬಿನ್ನಯೋ.... ಸೊಲ್ಮೆಲು
ramesh, mangalore ಪ್ರತಿಕ್ರಿಯಿಸಿದ್ದಾರೆ :
11/04/2014 at 02:30 PM
ಎಡ್ದೆ ಬರವು ನನಲ ಇಂಚಿತ್ತಿನ ಬರವುನುಬರೆಲೆಮೇಡಂ ಸೊಲ್ಮೆಲು
ಪ.ರಾಮಚಂದ್ರ, ದುಬೈ -ಸಂಯುಕ್ತ ಅರಬ್ ಸಂಸ್ಠಾನ ಪ್ರತಿಕ್ರಿಯಿಸಿದ್ದಾರೆ :
09/04/2014 at 06:29 PM
ಕರಾವಳಿ ಕರ್ನಾಟಕದ ಅಪೂರ್ವ ಬೂತಗಳ ಬಗ್ಗೆ ಪತ್ರಿಕೆಯ ಅಂತರ್ಜಾಲ ಆವೃತ್ತಿಯಲ್ಲಿ ಪ್ರಕಟಿಸಿ ಹೊರನಾಡ ಮತ್ತು ವಿದೇಶದ ಕನ್ನಡಿಗರಿಗೆ ತುಳು ಭಾಷೆಯ ಲೇಖನವನ್ನು ಓದಲು ಅನುಕೂಲ ಮಾಡಿಕೊಟ್ಟ ವಿಜಯ ಕರ್ನಾಟಕ ಪತ್ರಿಕಾ ಬಳಗಕ್ಕೆ ವಂದನೆಗಳು


No comments:

Post a Comment