Monday, 25 July 2016

ಸಾವಿರದೊಂದು ಗುರಿಯೆಡೆಗೆ :ತುಳುನಾಡ ದೈವಗಳು 320 ಕಟ್ಟೆದಲ್ತಾಯ ©ಡಾ.ಲಕ್ಷ್ಮೀ ಜಿ ಪ್ರಸಾದ


                                                        ಚಿತ್ರ ಕೃಪೆ :ಪರಶುರಾಮ ಸೃಷ್ಟಿ
ಒಂದೇ ದೈವ ಪ್ರಾದೇಶಿಕವಾಗಿ ಬೇರೆ ಬೇರೆ ಹೆಸರಿನಲ್ಲಿ ಆರಾಧನೆಗೊಳ್ವುದು ಸಾಮಾನ್ಯ.ಕೆಲವೊಮ್ಮೆ ಸ್ಥಳೀಯ ಶಕ್ತಿಗಳು ಯಾರೆಂದು ತಿಳಿಯದೆ ಇದ್ದಾಗಲೂ ಇನ್ನೊಂದು ಪ್ರಸಿದ್ಧ ದೈವದೊಂದಿಗೆ ಸಮನ್ವಯಗೊಂದು ಅದೇ ಹೆಸರಿನಲ್ಲಿ ಆರಾಧನೆ ಪಡೆಯುವುದು ಕೂಡ ಇದೆ.
ಕಟ್ಟೆದಲ್ತಾಯ ಇಂಥಹ ಒಂದು ದೈವ .ಬಜ್ಪೆ ಸಮೀಪದ ಪೆರಾರದಲ್ಲಿ ಕಟ್ಟೆದಲ್ತಾಯ ದೈವಕ್ಕೆ ಆರಾಧನೆ ಇದೆ.ಇಲ್ಲಿ .
ಈ ದೈವದ ಬಗ್ಗೆ ಯುವ ಸಂಶೋಧಕ ಅಭಿಲಾಶ್ ಚೌಟ ಅವರು ಮಾಹಿತಿ ನೀಡಿದ್ದಾರೆ .
ಅಲ್ಲಿ ಪ್ರಚಲಿತವಿರುವ ನಂಬಿಕೆಯಂತೆ ಅಣ್ಣಪ್ಪ ದೈವವೇ ಕಟ್ಟೆದಲ್ತಾಯ ಎಂಬ ಹೆಸರಿಂಲ್ಲಿ ಆರಾಧನೆ ಪಡೆಯುತ್ತದೆ.ಪೆರಾರದಲ್ಲಿ ಬಲವಾಂಡಿ ದೈವದ ಪಾತ್ರಿ ಕಟ್ಟದ ನೀರಿಗೆ ಹರಳು ಹೋಗುವ ಸನ್ನಿವೇಶದ ಅಭಿವ್ಯಕ್ತಿ ಇದೆ.ಅಲ್ಲಿನ ಆ ನೀರಿನ ಕಟ್ಟವನ್ನು ಕಾಯುವ ದೈವ ಕಟ್ಟದಲ್ತಾಯ.ಅಲ್ಲಿ ಆತ ಪೊಟ್ಟ ಪಂಜುರ್ಲಿ ಜೊತೆಗೆ ಆರಾಧನೆ ಪಡೆಯುತ್ತಾನೆ
ಕದ್ರಿಯಿಂದ ಧರ್ಮಸ್ಥಳಕ್ಕೆ (ಆಗಿನ ನೆಲ್ಯಾಡಿ ಬೀಡಿನ ಕುಡುಮ ಕ್ಕೆ )ಶಿವಲಿಂಗವನ್ನು ತೆಗೆದುಕೊಂಡು ಅಣ್ಣಪ್ಪ ಹೋಗುವಾಗ ದಾರಿ ಮಧ್ಯ ಪೆರಾರದಲ್ಲಿ ಬಲವಾಂಡಿ ದೈವ ಎದುರಾಗುತ್ತದೆ .ಅಲ್ಲಿ ಅಣ್ಣಪ್ಪನಲ್ಲಿರುವ ಶಿವಲಿಂಗವನ್ನು ಆತ ಸೆಳೆದು ತೆಗುಯುತ್ತಾನೆ ಆಗ ಅವರೊಳಗೆ ಒಂದು ಒಪ್ಪಂದವಾಗುತ್ತದೆ .ಧರ್ಮಸ್ಥಳದ ವಾಕ್ ತೀರ್ಮಾನ ಮಾಡುವ ಹಕ್ಕನ್ನು ಪೆರಾರದ ನೂರ್ದಾಲ ಪಟ್ಟದರಸರಿಗೆ,ಬಲವಾಂಡಿಯ ಬಂಟ ಕಲ್ಲು ಎದುರು ಮಾಡಲು ಅನುಮತಿ ನೀಡುತ್ತಾನೆ.ಅಲ್ಲಿನ ನೀರಿನ ಕಟ್ಟವನ್ನು ಕಾಯುವ ಜವಾಬ್ದಾರಿ ಯನ್ನು ಅಣ್ಣಪ್ಪ ವಹಿಸಿಕೊಳ್ಳುತ್ತಾನೆ ಆದ್ದರಿಂದ ಆತ ಕಟ್ಟದಲ್ತಾಯ ಎಂದು ಕರೆಸಿಕೊಳ್ಳುತ್ತಾನೆ.
ಇಲ್ಲಿ ಕಟ್ಟದಲ್ತಾಯ ದೈವಕ್ಕೆ ಮನುಷ್ಯ ರೂಪಿನ ಮುಖವಾದ /ಮುಗ ಇದೆ,ಪಂಜುರ್ಲಿಗೆ ಹಂದಿಯ ಮುಗ ಇಡುತ್ತಾರೆ ಎಂದು ಅಭಿಲಾಶ್ ಅವರು ಮಾಹಿತಿ ನೀಡಿದ್ದಾರೆ.ಪಡು ಪೆರಾರದಲ್ಲಿ ಕಟ್ಟಲ್ತಾಯ ಪಂಜುರ್ಲಿ ದೈವಸ್ಥಾನವಿದೆ
ಮಾಹಿತಿ ನೀಡಿದ ಅಭಿಲಾಶ್ ಚೌಟ ಅವರಿಗೆ ಧನ್ಯವಾದಗಳು


Sunday, 3 July 2016

ಸಾವಿರದೊಂದು ಗುರಿಯೆಡೆಗೆ:ತುಳುನಾಡ ದೈವಗಳು316-317 ಮಾಪುಳೆ ಮಾಪುಳ್ಚಿ ದೈವಗಳು (c)ಡಾ.ಲಕ್ಷ್ಮೀ ಜಿ ಪ್ರಸಾದ

ತುಳುನಾಡಿನಲ್ಲಿ ಆರಾಧನೆ ಪಡೆಯುವ ದೈವಗಳೆಷ್ಟು?ಈ ಪ್ರಶ್ನೆಗೆ ಉತ್ತರಿಸುವುದು ಬಹಳ ಕಷ್ಟ ಯಾಕೆಂದರೆ ಎಲ್ಲ ದೈವಗಳ ಹೆಸರು ಕೂಡ ಇನ್ನು ಸಂಗ್ರಹವಾಗಿಲ್ಲ ,ನಾನು 1210 ದೈವಗಳ ಹೆಸರನ್ನು ಸಂಗ್ರಹ ಮಾಡಿದ್ದೆ ,ಆದರೆ ಇದಾದ ನಂತರ ಕೂಡ ಪರ್ಪಂಕರಿಯತ್ತಾಯ ,ಲಿಂಗಮ್ಮ ,ವೀರಮ್ಮ,ಹೊನ್ನಮ್ಮ ,ಗುಡ್ಡೆತಿ,ಚೊಬ್ಬಯ್ಯ,ಉಮ್ಬಲಿ ,ಮುಗುಳಿತ್ತಾಯ,ಪಟ್ಟೋರಿತ್ತಾಯ,ಕಾಮ್ಬೋಡಿದ ಪುರ್ಷ ಭೂತ ಕುಂಜೂರನ್ಗಾರ  ಮೊದಲಾದ ಅನೇಕ ಹೆಸರುಗಳು ಸಿಕ್ಕಿವೆ ,
ಅಲ್ಲದೆ ಪುರುಷ ಎಂಬ ಒಂದು ಹೆಸರಿನಲ್ಲಿ ನಾಲ್ಕು ದೈವಗಳಿಗೆ ಆರಾಧನೆ ಇರುವುದು ತಿಳಿಯಿತು ಅಂತೆಯೇ ಹೆಸರು ಒಂದೇ ಆಗಿದ್ದರೂ ಆರಾಧಿಸಲ್ಪಡುವ ಶಕ್ತಿಗಳು ಬೇರೆ ಬೇರೆ ಆಗಿರುವದು ಅನೇಕ ಕಡೆಗಳಲ್ಲಿ ಕಾಣಿಸುತ್ತದೆ
ಈ ಹಿಂದೆ ಕುಂಬಳಚ್ಚೇರಿ(ಉತ್ತರ ಕೊಡಗು ಜಿಲ್ಲೆ )ಯಲ್ಲಿ ಆರಾಧನೆ ಪಡೆಯುವ ಮಾಪುಳೆ ಮಾಪುಳ್ತಿ ದೈವಗಳ ಬಗ್ಗೆ ತಿಳಿಸಿದ್ದೆ .
ಇಂದು ಇದೇ ಹೆಸರಿನಲ್ಲಿ ಇನ್ನು ಎರಡು ದೈವತಗಳಿಗೆ ಆರಾಧನೆ ಇರುವ ಬಗ್ಗೆ ಶ್ರೀಯುತ ಶಿವರಾಮ ಭಟ್ ಅವರು ತಿಳಿಸಿದರು .
ಸವಣೂರು ನಲ್ಲಿ ಈ ದೈವಗಳ ಆರಾಧನೆ ಶಿವರಾಮ ಭಟ್ಟರ ಮನೆಯಲ್ಲಿ ನಡೆಯುತ್ತದೆ .ಮಾಪುಳೆ ಮಾಪುಲ್ತಿಯರಿಗೆ ಒಂದು ಕಲ್ಲು ಹಾಕಿ ಆರಾಧಿಸುತ್ತಾರೆ.(C).ಡಾ.ಲಕ್ಷ್ಮೀ ಜಿ ಪ್ರಸಾದ
ಅಲ್ಲಿ ಬಲ್ರಾಂಡಿ ಎಂಬ ಪ್ರಧಾನ ದೈವಕ್ಕೆ ಆರಾಧನೆ ಇದೆ.ಈ ದೈವ ಘಟ್ಟದಿಂದ ಇಳಿದು ಬರುವಾಗ ಹಲಸಿನ ಹಣ್ಣನ್ನು ಒಂದು ಮುಸ್ಲಿ ದಂಪತಿಗಳು ಕದಿಯುತ್ತಾರೆ.ಆಗ ದೈವದ ಆಗ್ರಹಕ್ಕೆ ತುತ್ತಾಗಿ ಅವರು ಕಲ್ಲಾಗಿ ಮಾಯವಾಗುತ್ತಾರೆ ನಂತರ ಅವರು ಅಲ್ಲಿ ಸೇರಿಗೆ ದೈವಗಳಾಗಿ ಮಾಪುಳೆ ಮಾಪುಳ್ಚಿ ಹೆಸರಿನಲ್ಲಿ ಆರಾಧನೆ ಪಡೆಯುತ್ತಾರೆ .
ವಿಧಿ ನಿಷೇಧಗಳು ಆದಿ ಮಾನವನ ಅಲಿಖಿತ ಶಾಸನಗಳು.ಇವನ್ನು ಮೀರಿದವರಿಗೆ ಶಿಕ್ಷೆ ನಿಶ್ಚಿತಸಾಮಾನ್ಯವಾಗಿ ನಮ್ಮಲ್ಲಿ ದೈವಕ್ಕೆ ಕುಡಿ ಕಟ್ಟಿ ಇಟ್ಟ ಹಣ್ಣನ್ನು ಕದಿಯಬಾರದು ಎಂಬ ನಂಬಿಕೆ ಇದೆ   ಅಂತೆಯೇ ಇಲ್ಲಿ ನಿಷೇಧವನ್ನು ಮೀರಿದ ವ್ಯಕ್ತಿಗಳು ದುರಂತವನ್ನಪ್ಪಿರಬೇಕು .ದುರಂತ ಮತ್ತು ದೈವತ್ವ ತುಳು ಸಂಸ್ಕೃತಿಯಲ್ಲಿ ಹಾಸುಹೊಕ್ಕಾದ ವಿಚಾರ ಅಂತೆಯೇ ಈ ಮುಸ್ಲಿಂ ದಂಪತಿಗಳು ದುರಂತವನ್ನಪ್ಪಿ ದೈವತ್ವ ಪಡೆದು ಆರಾಧಿಸಲ್ಪಡುತ್ತಾರೆ.ದೈವದ ಅನುಗ್ರಹಕ್ಕೆ ಪಾತ್ರರಾದವರು ದೈವ ದೇವಸ್ಥಾನಗಳನ್ನು ಕಟ್ಟಿಸಿದವರು ಇಲ್ಲಿ ದೈವತ್ವ ಪಡೆದು ಆರಾಧಿಸಲ್ಪಡುವುದು ಸಾಮಾನ್ಯ ವಿಚಾರ ಅಂತೆಯೇ ದೈವದ ಆಗ್ರಹಕ್ಕೆ ಸಿಕ್ಕಿ ದುರಂತವನ್ನಪ್ಪಿದವರೂ ಇಲ್ಲಿ ಅದೇ ದೈವದ ಸೇರಿಗೆ ದೈವಗಳಾಗಿ ಆರಾಧನೆ ಪಡೆಯವುದು ತುಳು ಸಂಸ್ಕೃತಿಯ ಅನನ್ಯತೆ .ಇಲ್ಲಿ ಇವರು ದೈವಗಳಾಗುವ ಮೊದಲು ಏನಾಗಿದ್ದರು ಯಾರಾಗಿದ್ದರು ?
ಎಂಬುದು ಮುಖ್ಯವಾಗುವುದೇ ಇಲ್ಲ ದೈವತ್ವ ಪಡೆದ ನಂತರ ಅವರೆಲ್ಲ ನಮ್ಮನ್ನು ಕಾಯುವ ಶಕ್ತಿಗಳು ಎಲ್ಲರಿಗೂ ಒಂದೇ ರೀತಿಯ ಭಕ್ತಿಯ ನೆಲೆ ಇದು ತುಳು ಸಂಸ್ಕೃತಿಯ ಔನ್ನತ್ಯದ ಪ್ರತೀಕ (c)ಡಾ.ಲಕ್ಷ್ಮೀ ಜಿ ಪ್ರಸಾದ
ಮಾಹಿತಿ ನೀಡಿದ ಶಿವರಾಮ ಭಟ್ ಹಾಗೂ ಮಾಹಿತಿ ಸಂಗ್ರಹದಲ್ಲಿ ಸಹಾಯ ಮಾಡಿದ ಪದ್ಮನಾಭ ಆಚಾರ್ಯ ಅವರಿಗೆ ಹೃತ್ಪೂರ್ವಕ ಕೃತಜ್ಞತೆಗಳು