ಸಾವಿರದೊಂದು ಗುರಿಯೆಡೆಗೆ :ತುಳುನಾಡ ದೈವಗಳು -166:ಇಲ್ಲತ್ತಮ್ಮ ಕುಮಾರಿ -ಡಾ.ಲಕ್ಷ್ಮೀ ಜಿ ಪ್ರಸಾದ

                                
                                             ಚಿತ್ರ ಕೃಪೆ :ಕುಡುಪು ನರಸಿಂಹ ತಂತ್ರಿಗಳು
 ನನ್ನ ಸಾವಿರದ ಅರುವತ್ತೈದು ದೈವಗಳ ಪಟ್ಟಿ ಅಂತಿಮವಲ್ಲ ಎಂದು ನಾನು ಹೇಳಿದ್ದೆ .ಹೌದು! ಇನ್ನೂ ಎಷ್ಟೋ ದೈವಗಳ ಹೆಸರು ಕೂಡ ಸಿಕ್ಕದೆ ಇರುವ ಸಾಧ್ಯತೆ ಇದೆ .ಇಲ್ಲತ್ತಮ್ಮ ಕುಮಾರಿ ಈ  1065 ರ ಪಟ್ಟಿಯಲ್ಲಿ ಸೇರ್ಪಡೆಯಾಗಿಲ್ಲ .ಈ ದೈವದ ಬಗ್ಗೆ ನಿನ್ನೆಯಷ್ಟೇ ನನಗೆ ತಿಳಿಯಿತು .
ಮಹಾ ಸತಿ ಆಚರಣೆ ಹಾಗೂ ಮಾಸ್ತಿ ಸ್ತಿ ವಿಗ್ರಹಗಳ ಕುರಿತು ಹೆಚ್ಚ್ಚಿನ ಮಾಹಿತಿಗಾಗಿ ಡಾ.ಬಸವರಾಜ ಕಲ್ಗುಡಿ ಅವರ ಮಹಾ ಸತಿ ಆಚರಣೆ -ಒಂದು ಅಧ್ಯಯನ ,ಹಾಗೂ ಬಿಎಂ ರೋಹಿಣಿ ಹಾಗೂ ಶಶಿಲೇಖ ರಚಿಸಿದ ತುಳುನಾಡಿನ ಮಾಸ್ತಿ ಕಲ್ಲುಗಳು ವೀರಗಲ್ಲುಗಳು ಕೃತಿಗಳನ್ನು ತಿರುವಿ ಹಾಕುತ್ತಾ ಇದ್ದೆ .

ತುಳುನಾಡಿನ ಮಸ್ತಿ ಕಲ್ಲು ವೀರಗಲ್ಲುಗಳ ಬಗ್ಗೆ ಓದುತ್ತಾ ಇದ್ದಾಗ ಇಲ್ಲತ್ತಮ್ಮ ಕುಮಾರಿ ಎಂಬ ಹೆಸರು ಗಮನ ಸೆಳೆಯಿತು .
ಕುಡುಪು ನರಸಿಂಹ ತಂತ್ರಿಗಳ ಮನೆ ದೈವ ಪಂಚ ಜುಮಾದಿಯ ದೈವಸ್ಥಾನದ ಗರ್ಭ ಗುಡಿಯಲ್ಲಿ ಒಂದು ಮರದ ಸ್ತ್ರೀ ಮೂರ್ತಿ ಯಿದೆ .ಇದು ಪಂಚ ಜುಮಾದಿ ದೈವದ ಸೇರಿಗೆ ದೈವವಾಗಿದೆ.ಈ ದೈವತಕ್ಕೆ ನಾನೂರು ವರ್ಷಗಳ ಹಿನ್ನೆಲೆ ಇದೆ.ನಾನೂರು ವರ್ಷಗಳಿಂದ ಇಲ್ಲತಮ್ಮ ಕುಮಾರಿ ನರಸಿಂಹ ತಂತ್ರಿಗಳ ಮನೆ ದೈವವಾಗಿ ಆಆರಾಧನೆ ಹೊಂದುವ  ದೈವವಿದು.
ತುಳುನಾಡಿನಲ್ಲಿ ದೈವತ್ವ ಪ್ರಾಪ್ತಿಗೆ ಇಂತಹದ್ದೇ ಎಂದು ಹೇಳುವ ನಿಯಮವಿಲ್ಲ .ಎಲ್ಲ ಜಾತಿ ವರ್ಗಗಳ ಮಂದಿ ಇಲ್ಲಿ ದೈವತ್ವ ಪಡೆದು ಆರಧಿಸಲ್ಪಡುತ್ತಿದ್ದಾರೆ.© ಡಾ.ಲಕ್ಷ್ಮೀ ಜಿ ಪ್ರಸಾದ್ 
ಅನೇಕ ಬ್ರಾಹ್ಮಣ ಸ್ತ್ರೀಯರೂ ಇಲ್ಲಿ ಕಾರಣಾಂತರಗಳಿಂದ ಮಾಯಆಗಿ ದೈವತ್ವ ಪಡೆದು ಆರಧಿಸಲ್ಪಡುತ್ತಿದ್ದಾರೆ .ಊರ್ವ ಚಿಲಿಮ್ಬಿಯಲ್ಲಿ ಅರಬ್ಬೀ ಭೂತದೊಂದಿಗೆ ಆರಾಧನೆ ಹೊಂದುವ ಬ್ರಾಂದಿ ಭೂತ ,ಪೊಟ್ಟ ಭೂತದೊಂದಿಗೆ ಆರಾಧನೆ ಹೊಂದುವ ಬ್ರಾಂದಿ ಭೂತ ,ವಿಧವೆಯೊಬ್ಬಳು ಮಾಯವಾಗಿ ದೈವತ್ವ  ಪಡೆದ ಮುಂಡೆ ಬ್ರಾಂದಿ ಭೂತ ,ಓಪೆತ್ತಿ ಮದಿಮಾಲ್ ,ಕೆರೆ ಚಾಮುಂಡಿ ,ಮೊದಲಾದ ದೈವಗಳು ಮೂಲತ ಬ್ರಾಹ್ಮಣ ಮೂಲದ ಸ್ತ್ರೀಯರು .

ಕುಡುಪು ನರಸಿಂಹ ತಂತ್ರಿಗಳ ಮನೆ ದೈವವಾಗಿರುವ ಇಲ್ಲತ್ತಮ್ಮ ಅವರಕುಟುಂಬಕ್ಕೆಕ್ಕೆ ಸೇರಿದ ಬ್ರಾಹ್ಮಣ ಹುಡುಗಿ .ಆ ಬ್ರಾಹ್ಮಣ ಹುಡುಗಿ ನಾನೂರು ವರ್ಷಗಳ ಹಿಂದೆ ಯಾವುದೊ ಕಾರಣಕ್ಕೆ ಮಾಯವಾಗುತ್ತಾಳೆ .ಮಯವದವರು ದೈವತ್ವ ಹೊಂದಿ ಆರಾಧನೆ ಪಡೆಯುವುದು ತುಳು ಸಂಸ್ಕೃತಿಯಲ್ಲಿ ಅಸಹಜವೇನೂ ಅಲ್ಲ .ಅಂತೆಯೇ ಆ ಹುಡುಗಿ ಕೂಡ ದೈವತ್ವ ಪಡೆದು ಆರಾಧಿಸಲ್ಪಡುತ್ತಾಳೆ.
ಈ ದೈವದ ಮೂರ್ತಿಯ ಬಲ ಗೈಯಲ್ಲಿ ಅಮೃತ ಕಲಶ ,ಎಡ ಗೈಯಲ್ಲಿ ಔಷಧಿಯ ಬೇರೂ ಇದೆ ಎಂದು ಬಿಎಂ ರೋಹಿಣಿ ಅವರು ತಿಳಿಸಿದ್ದಾರೆ .
ಯಾರಿಗಾದರೂ ಹೆರಿಗೆಯಲ್ಲಿ ತೊಂದರೆಯಾದರೆ ,ಬಾಣಂತಿಗೆ ತೊಂದರೆಯಾದರೆ ಈ ದೈವಕ್ಕೆ ಹರಸಿಕೊಂಡರೆ  ರಕ್ಷಣೆ ಸಿಗುತ್ತದೆ ಎಂಬ ನಂಬಿಕೆ ಅಲ್ಲಿದೆ © ಡಾ.ಲಕ್ಷ್ಮೀ ಜಿ ಪ್ರಸಾದ್ 
ಇಲ್ಲತ್ತ ಅಮ್ಮ ಎಂದರೆ ಮನೆಯ ಅಮ್ಮ .ಹಿರಿಯ ಸ್ತ್ರೀ ಎಂಬ ಅರ್ಥ ,ಇಲ್ಲತ್ತಮ್ಮ ಕುಮಾರಿ ಎಂದಿರುವುದರಿಂದ ಈಕೆ ಅವಿವಾಹಿತೆ ಎಂದು ತಿಳಿಯುತ್ತದೆ .ಮನೆಯ ದೇವತೆ ಎಂಬ ಅರ್ಥದಲ್ಲಿಯೂ ಇಲ್ಲತ್ತಮ್ಮ ಎಂಬ ಪದ ಬಳಕೆಗೆ ಬಂದಿರಬಹುದು
ಈ ಬಗ್ಗೆ ಕುಡುಪು ತಂತ್ರಿಗಳ ಕುಟುಂಬದ ಶ್ರೀಯುತ ಪುರುಷೋತ್ತಮ ತಂತ್ರಿಗಳು ಇಲ್ಲತಮ್ಮ ನಮ್ಮಕುಟುಂಬದ ಹಿರಿಯ ಮಹಿಳೆ ಅವಿವಾಹಿತೆ .ಇವರು ಹಳ್ಳಿ ಮದ್ದುಗಳನ್ನು ಕೊಡುವುದರಲ್ಲಿ ಪರಿಣತರಾಗಿದ್ದರು .ಯಾರು ಅತ್ಯಂತ ಉದಾರಿಗಳಾಗಿದ್ದುಎಲ್ಲರಿಗೂ ಉಚಿತವಾಗಿ  ಔಷಧ ವನ್ನು ಕೊಡುತ್ತಿದ್ದರು ಒಂದು ದಿನ ಇದ್ದಕ್ಕಿದ್ದ ಹಾಗೆ ಮಾಯ ವಾಗಿ ದೈವತ್ವ ಪಡೆದರು .ಇದು ಸುಮಾರು ನಾನ್ನೂರು ವರ್ಷಗಳ ಹಿಂದಿನ ಘಟನೆ ..ತಮ್ಮ ಮನೆ ದೈವ ಪಂಚ ಜುಮಾದಿ ಯೊಂದಿಗೆ ಇವರಿಗೂ ದೈವತ್ವದ ನೆಲಯಲ್ಲಿ ಆರಾಧನೆ ಇದೆ .ಇಲ್ಲತಮ್ಮನನ್ನು ಔಷಧಮ್ಮ ,ಅಜ್ಜಿ ಅಜ್ಜಮ್ಮ ಎಂದೂ ಕರೆದು ಆರಾಧಿಸುತ್ತಾರೆ"ಎಂಬ ಮಾಹಿತಿಯನ್ನು ನೀಡಿದ್ದಾರೆ.© ಡಾ.ಲಕ್ಷ್ಮೀ ಜಿ ಪ್ರಸಾದ್ 
ಮಾಹಿತಿ ಸಂಗ್ರಹದಲ್ಲಿ ಸಹಾಯ ಮಾಡಿದ ಶ್ರೀಯುತ ವೆಂಕಟ ರಾಜ ಕಬೆಕ್ಕೋಡು ಅವರಿಗೆ ಕೃತಜ್ಞತೆಗಳು
.ಆಧಾರ :ತುಳುನಾಡಿನ ಮಾಸ್ತಿ ಕಲ್ಲುಗಳು ಮತ್ತು ವೀರಗಲ್ಲುಗಳು ಲೇಖಕರು :ಬಿಎಂ ರೋಹಿಣಿ ಮತ್ತು ಶಶಿಲೇಖಾ ಬಿ